Bancos Alameda de Santiago

Bancos graníticos con respaldo de fundición. A base de pedra rectangular consta de dúas partes unidas entre si, que se elevan sobre tres bloques transversais tamén de pedra. O respaldo de ferro sitúase no centro da base, creando un espazo a cada lado para sentarse. O delicado traballo de fundición crea unha estrutura lixeira na que atopamos motivos vexetais —máis vistosos no medallón central—, as figuras de catro querubíns tocando a flauta e o laúde, e catro figuriñas de animais. O respaldo vai unido á pedra con catro brazos de ferro fundido, que tamén reproducen motivos vexetais e funcionan como elementos de apoio e soporte.