Cuberta “Viaje y fin de Don Frontán”

Carlos Maside deseñou a cuberta desta peza teatral tráxica de Rafael Dieste. A comezos da década dos anos trinta, a produción gráfica de Maside amosa a influencia das vangardas europeas —expresionismo e fauvismo—, recibida durante a súa viaxe a París na década anterior. A cuberta presenta unha composición de carácter expresionista, resolta mediante formas planas e contrastes cromáticos acusados. O deseño está dominado por unha escena central na que aparecen as figuras estilizadas do pai e do fillo, protagonistas da obra, dispostas en diagonal, cun xogo de inversión e contrapunto que suxire conflito e inestabilidade. Esta escena complétase cunha rotulación xeométrica de influencia vangardista.