Mascota Pelegrín

Mascota creada para a promoción do Ano Santo compostelán de 1993. Foi unha das imaxes promocionais máis difundidas do Xacobeo 93, un intenso plan turístico-cultural que a Xunta de Galicia desenvolveu durante ese ano e que, a partir de entón, acompaña a cada Ano Santo. Esta personaxe, de natureza incerta e corpo xeométrico, foi creada por Luis Esperanza na axencia de publicidade de Luis Carballo. Foi reproducida en multitude de soportes e formatos, entre os máis comúns atopamos os pins e as camisetas, pero tamén se fixeron pezas de animación. É un deseño de formas básicas e cores vibrantes. O seu corpo está composto de formas cónicas; mentres, a cabeza ten unha forma máis orgánica con dous grandes ollos circulares. A súa xestualidade limitábase ao movemento do conos, non tiña nin nariz nin boca. A miúdo levaba un bastón cunha cabaza. Conviviu con outras mascotas moi populares, como Curro na Expo de Sevilla ou Cobi e Petra nos Olimpíadas de Barcelona. Pelegrín foi a imaxe da Volta Ciclista a España en 1992, polo que para a inauguración do Ano Santo Xacobeo 93 xa era amplamente coñecida. É parte do imaxinario da época dentro e fóra de Galicia, aínda que hoxe —en 2025— xa non se usa oficialmente como mascota.