Cartel “¡Alto! Merque vosté Un ollo de vidro”

Cartel promocional do primeiro libro en prosa de Castelao, de temática anticaciquil e sobre o mundo de ultratumba. A composición está dominada por unha figura teatral e inquietante, de rostro enmascarado, que se ergue sobre unha caveira que aparece na cuberta da novela. A man dereita da personaxe sostén o logotipo da editorial Céltiga, mentres, á esquerda sinala o “ollo de vidro”, un xesto que introduce un xogo visual e simbólico. O uso de formas planas, contornos grosos e cores limitadas (ocre, branco e negro) acentúa o impacto gráfico e facilita a lectura a distancia, seguindo os principios dos carteis publicitarios da época.