Cadeira antropomórfica e mesa

Este mobiliario, que se atopaba nas galerías Sargadelos, está feito con madeira de castiñeiro e ferro. Mantendo unha estrutura de elementos clásicos —4 patas, asento, respaldo e brazos— Isaac Díaz Pardo busca e consegue unha cadeira innovadora, un moble que parece “debuxar” unha figura humana. Unha obra rudimentaria e escultural na que se pode sentar. A columna vertebral —cun par de costelas— é de ferro; e a cabeza, brazos e patas están feitas con madeira de formas redondeadas. A mesa, tamén de madeira e ferro, presenta un deseño no que todas as liñas son curvas. Unha proposta novidosa para a época, que non pasa desapercibida aínda que semelle non ocupar espazo.
A maneira na que Isaac aborda e traballa os materiais, a ensamblaxe, as proporcións —e desproporción— das partes, semellan remitir a códigos máis orgánicos ca sofisticados.